ماں اوراولاد کے مثالی رشتے کے متعلق تو آپ نے بہت کچھ لکھ پڑھ رکھا ہوگا لیکن کیا آپ سوچ سکتے ہیں کہ کوئی ماں صرف فلائٹ مس ہو جانے کے خدشے سے اپنی سگی اولاد کو ٹوائلٹ میں پھینک کرجا سکتی ہے؟
آسٹریا کے دارالحکومت ویانا میں ایک نومولود بچہ اس وجہ سے ہلاک ہوگیا.
کیونکہ اس کی ماں پرواز کو ہر صورت پکڑنے کے لیے اسے ائیرپورٹ کے ٹوائلٹ میں چھوڑ کر چلی گئی۔
یہ بچہ 10 نومبر کو رات دو بجے کے قریب آسٹریا کے بین الاقوامی ائیرپورٹ سے صفائی کے عملے نے ائیرپورٹ سے زندہ دریافت کیا تھا جس کے بعد ایمرجنسی سروسز کو فوری طور پر طلب کیا گیا مگر یہ ننھا فرشتہ ہسپتال میں چل بسا۔
بچے کی ماں کو بھی ائیرپورٹ ٹرمینل کے قریب ‘حالتِ غیر’ میں پایا گیا جبکہ اس کو بھی بچے کے ساتھ ہی ہسپتال لے جایا گیا، جہاں بعد ازاں اس کی حالت بہتر بتائی گئی۔
مقامی میڈیا کی رپورٹ کے مطابق ایسا لگتا ہے کہ ماں نے بچے کو وہیں ٹوائلٹ میں جنم دیا اور پھر اس لیے چھوڑ دیا کیونکہ وہ بیلاروس سے واشنگٹن ڈی سی تک کے سفر کے لیے کنکٹنگ پرواز کو چھوڑنا نہیں چاہتی تھی۔
تاہم خاتون سے زیادہ چلا نہیں گیا اور وہ کچھ دور جاکر نیچے گر کے شاید بے ہوش ہوگئی تاہم ابھی تک واضح طور پر کچھ کہا نہیں جاسکتا۔
اس نائیجرین خاتون کو ویانا کی پولیس نے حراست میں لے لیا ہے اور بچے کی موت کی وجہ جاننے کے لیے پوسٹمارٹم کیا جارہا ہے۔
